1Jo 1 | BYX | STEP | I ngu narliip ngu reqerl a ngen sevet ma Iesus Kristus. I as maikka murl miaimek, i lua i ngere rarlma ama tekmeriirang mai, de qasa qurli luqa i ama Saikngias-pem-ka. I qatikka luqa dai ama rarlimini se ama iames. De murl i ngu ne iari ama Aposelkena dai maikka uuret lu qa ver aa mugunes a iara ver aa aatmitki veleqes na uut. De maikka uut narli aa lengi i qe su uut. De qatikka uure tek per aa qetdingki ne auur a ngerik.

1 John 1

Ma Iesus Ka Men Saver Ama Aivetki I Ama Saikngias Pem Ka

1 I ngu narliip ngu reqerl a ngen sevet ma Iesus Kristus. I as maikka murl miaimek, i lua i ngere rarlma ama tekmeriirang mai, de qasa qurli luqa i ama Saikngias-pem-ka. I qatikka luqa dai ama rarlimini se ama iames. De murl i ngu ne iari ama Aposelkena dai maikka uuret lu qa ver aa mugunes a iara ver aa aatmitki veleqes na uut. De maikka uut narli aa lengi i qe su uut. De qatikka uure tek per aa qetdingki ne auur a ngerik. 2 I ama a revan, i baing se ama iames nagel ama Ngemumaqa mene ma Kristus, be qatikka mager iv uure sil sevet liina i raquarli uut lu qa ne auur a saqang de uut taqen ne auur a revan sevet liina. I murl kurli qa gel aa Mam, de uut sil sever aa dlek i qe iames masmas de qa reqerl auut ne liirang aa mai. 3 Taqurla de ngua iil sagel ngen sevet lungera ama lengi i qa su uut tem nget, de ngu teqerl a ngen ne aa tekmeriirang i uuret lu i qa rekmet niirang. I maikka mager ip lungera iara ama lengi dai ngere tekmet nauut iv ama quanases mer uut per ama Ngemumaqa aa gamansena, de ama arlias per auut i ding se uut men auut Mam de aa Uimka ma Iesus Kristus. 4 Taqurla dai be ngua iil luqa ama langinka sagel ngen ip buup ngen ne ama arlias nevet liina de saqikka diiv ama arlias per auut katikka.

Maikka Mager Iv Uut Tit Pe Ama Nirlaqi

5 I ama Lengi i ma Iesus ka qurl a uut iv uure sil na nget; dai nget taqurliani: Ama Ngemumaqa dai qa ip taquarl luqia ama nirlaqi i qin sin be qi bingbing men ama arlenki. Be maikka quasiq a nge ama arlenes gel ka. Maikka quasik! 6 I ariq uure tuqun ai rerlas tem uut men a qa, dap per auur a mugunes dai uure taneng ama viirang, dai maikka uut tit puuqas men ama arlen, dai maikka ai de uure kaak temiis, be quasik uure tekmet ne ama revan. 7 Dav ariq aiv uut tit nep ma Iesus aa aiska i maikka men ama nirlaqa, de aa gamansena ip taquarl ama nirlaqi ama atluqi mirlek nauut, dai diiv ama arlias per auut never a na. Katikka raqurla be diip ma Iesus ke tekmet ip ke lemerl uut te auur a viirang i raquarli aa qerekka qa rletik sever auur a viirang de mager iv ama Ngemumaqa aa Uimka ke lemerl uut de qe suquv auur a viirang mai.

8 Dav ariq uure tuqun ma’, ‘Katikka, quasik gua nge ama viini.’ Dai maikka lua dai ai de uure kaak temiis. Be uut drlem ai quasiq ai ama revan auur a tuaqevep dav uure kaak. 9 Dap muqas i ariq aiv uure sekdem mer auur a viirang, dai ama Ngemumaqa i ama seserlka, dai mager ip diip ke suqup liirang aa mai ip taquarl ka muvuusep. De diip ke lemerl uut te liirang aa ama viirang, i iirang ngere lenges nauut. 10 I quaatta i ariq uure tuqun ai quasiq ama vura nauut, dai uure teqerl ai quasik kurl ama Ngemumaqa aa lengi de auur a rlan, dav uut taarl na qa ai ama kaak-ka na qa. I raquarli sa qa mis uut mai, ai ama vura na uut de aa saqang.